కాంగ్రెస్ సీనియర్ నేతల్లో 23 మంది ఇటీవల పార్టీ తాత్కాలిక అధ్యక్షురాలు సోనియాకు రాసిన సుదీర్ఘ లేఖపై.. అంతర్గతంగా పెద్ద దుమారమే చెలరేగింది. పార్టీలో నాయకత్వ లోపం, నిర్ణయాల లేమి తదితర అంశాలను వారంతా ప్రస్తావించినట్లు సమాచారం. అయితే వారి సూచనలను పరిగణనలోకి తీసుకున్న కాంగ్రెస్ అధిష్ఠానం.. తాజాగా సంస్కరణలు మొదలుపెట్టింది. లోక్సభ, రాజ్యసభ కమిటీల్లో అనూహ్యంగా మార్పులు చేసింది. అయితే ఇందులో లేఖ రాసిన 23 మంది అసమ్మతివాదులకు చోటు దక్కకపోవడం గమనార్హం.
ప్రాతినిధ్యం లేనివారికి పదవులా...?
లోక్సభలో రవ్నీత్ సింగ్ బిట్టూకు విప్గా బాధ్యతలు అప్పగించింది పార్టీ అధిష్ఠానం. లేఖ రాసిన వారిలో ఉన్న సీనియర్లు మనీశ్ తివారీ, శశి థరూర్కు మాత్రం చోటు దక్కలేదు.
రాజ్యసభలో చీఫ్ విప్గా జైరాం రమేశ్ను నియమించారు. అంతేకాదు కేంద్ర ప్రభుత్వం తీసుకొచ్చే ఆర్డినెన్స్లపై మాట్లాడేందుకు ఐదుగురు సభ్యులతో కూడిన కన్వీనర్ కమిటీని ఏర్పాటు చేసింది కాంగ్రెస్. ఇందులో మాజీ కేంద్ర మంత్రి కపిల్ సిబల్కు చోటివ్వలేదు. గులాం నబీ ఆజాద్కు బదులుగా రాహుల్ సన్నిహితుడు కేసీ వేణుగోపాల్కు అవకాశం దక్కింది.
ఈ తాజా నిర్ణయాలపై కాంగ్రెస్ తీరును ప్రశ్నించారు కాంగ్రెస్ బహిష్కృత నేత సంజయ్ ఝా.
" కాంగ్రెస్ నుంచి పార్లమెంటులో తమ గళం వినిపించే వారిలో శశి థరూర్, మనీశ్ తివారీ ముందుంటారు. వాళ్లు కేరళ (15 లోక్సభ స్థానాలు), పంజాబ్(8 లోక్సభ స్థానాల)కు ప్రాతినిధ్యం వహిస్తున్నారు. దాదాపు లోక్సభలోని కాంగ్రెస్కు ఉన్న 44 శాతం ఓటింగ్కు వారే ప్రాతినిధ్యం వహిస్తున్నారు. 1 సీటు ఉన్న బంగాల్, 2 సీట్లు ఉన్న అసోం తరఫు వ్యక్తులకు కీలక పదవులు ఇవ్వడం సమంజసమా..? "
-- సంజయ్ ఝా, కాంగ్రెస్ బహిష్కృత నేత
లోక్సభలో ప్రధాన ప్రతిపక్ష నాయకుడిగా అధిర్ రంజన్ చౌదరిని.. ఆయనకు డిప్యూటీగా సీనియర్ నాయకుడు గౌరవ్ గొగోయ్ను నియమించడాన్ని సంజయ్ తప్పుపట్టారు.
కీలకమైన పదవులను రాహుల్ గాంధీ సన్నిహిత వ్యక్తులకు అప్పగించినట్లు విమర్శలు వస్తున్నాయి. ఆయన నిర్ణయంతోనే అసమ్మతివాదులకు ఎదురుదెబ్బ తగిలినట్లు విశ్లేషణలు వినిపిస్తున్నాయి. అయితే... "ఇది పూర్తిగా సీపీపీ ఛైర్పర్సన్ నిర్ణయం. ఆమె ఈ పోస్టుల్లో ఏ కాంగ్రెస్ ఎంపీని అయినా నియమించవచ్చు" అని లోక్సభలోని కాంగ్రెస్ చీఫ్ విప్ కె. సురేశ్ స్పష్టం చేశారు.
